Real Madrid waxay u muuqataa inay ku dhameysan doonto xilli ciyaareedkii labaad oo xiriir ah iyada oo aan wax koob ah ku guuleysan, kadib markii laga reebay koobka Champions League oo ay ka adkaatay Bayern Munich. Los Blancos ayaa looga adkaaday 4-3 kulan ka dhacay Bavaria habeenkii Arbacada, halka guud ahaan labada lugood ay ku dhammaatay 6-4 oo ay ku badiyeen Bayern wareegga sideed dhammaadka.
Madrid ayaa aad uga carootay kaarka labaad ee jaalaha ah ee muranka dhaliyay ee la siiyay Eduardo Camavinga kadib markii uu joojiyay Bayern oo doonaysay inay si degdeg ah u qaadato laad xor ah.
Laakiin xaqiiqdu waa in Real Madrid aysan ku filneyn heerkeeda xilli ciyaareedkan. Waxay sagaal dhibcood ka dambeysaa hoggaamiyaasha LaLiga Barcelona, waxayna ku guuldarreysatay final-kii Supercopa oo ay ka qaadeen kooxda uu hoggaamiyo Hansi Flick, sidoo kale si lama filaan ah ayaa looga reebay Copa del Rey oo ay ka saartay kooxda Albacete oo ka ciyaarta heerka labaad Ee Horyaalka Spanish ka.
Zinedine Zidane waa tababaraha kaliya ee aan la eryin madaxweynaha Madrid Florentino Perez kadib xilli ciyaareed uu koob la’aan ku dhammeystay, taasoo ka dhigeysa Arbeloa mid halis weyn ku jira Mustaqbalkiisa Macalinimo.
Weriyaha Real Madrid ee The Athletic, Mario Cortegana, ayaa sheegay in Perez oo lagu tilmaamay “mid adag” ay aad ugu badan tahay inuu eryo Arbeloa dhammaadka xilli ciyaareedkan.
Tababaraha 43-jirka ah ayaa kaliya beddelay Xabi Alonso bishii Janaayo, balse sidoo kale wuxuu u muuqdaa inuu wajihi doono in shaqada laga ceyriyo.
Jürgen Klopp ayaa si weyn loola xiriirinayay isbuucyada si uu udhaqaaqo qalcada Bernabeu. Klopp Inuu qabto Real Madrid— waxaa loo arkaa mid ka mid ah tababarayaasha ugu waaweyn dunida—waa fursad yar oo ka mid ah kuwa dib ugu soo celin kara shaqada tababarenimo.
Cortegana ayaa magacaabay Klopp inuu yahay mid ka mid ah xulashooyinka la tixgelinayo, balse wuxuu intaas ku daray in halyeeyga Liverpool uu hadda doonayo inuu sii joogo doorkiisa ah madaxa kubadda cagta caalamiga ah ee Red Bull Ee uu hada xilka ka haayo.
Haddii Klopp uu diido inuu ku biiro Madrid xagaagan, markaas Perez waa inuu raadiyaa bartilmaameedyo kale.
Warbixintu waxay sheegtay in Pochettino uu yahay “musharax ka xoog badan” Klopp xaaladda hadda jirta.
Halka Klopp uu u muuqdo inuu ku qanacsan yahay shaqadiisa Red Bull, Pochettino waxaa laga yaabaa inuu ka tago shaqadiisa tababaraha xulka Mareykanka (USMNT) kadib Koobka Adduunka.
Pochettino waxaa “mar walba si weyn u qadariya Perez”, taasoo ka dhigeysa inuu noqdo musharax dhab ah oo beddeli kara Arbeloa.
Cortegana ayaa sidoo kale xusay Zinedine Zidane iyo Didier Deschamps inay sidoo kale yihiin xulashooyin uu Perez tixgelin karo.
Zidane waa tababare xor ah (free agent), wuxuuna leeyahay ixtiraam weyn oo uu ka helo Perez kadib markii uu si cajiib ah ugu hoggaamiyay kooxda saddex Champions League oo xiriir ah intii u dhaxeysay 2016 ilaa 2018.
Laakiin Zidane wuxuu doonayaa inuu beddelo Deschamps oo noqdo tababaraha xulka France kadib Koobka Adduunka.
Taasi waxay ka dhigan tahay in xagaaga marka la gaaro, Deschamps uu noqon karo tababaraha xor ah ee Madrid ay ka fikirto.
Deschamps wuxuu ku guuleystay Koobka Adduunka iyo UEFA Nations League isagoo hogaaminaya France, inkastoo uusan tababare kooxeed ahayn tan iyo 2012.
